Vaccas mumma Salers cun vadi
Igl onn 2014 vein nus midau dalla producziun da latg vi sin vaccas mumma. Per saver far quella midada vein nus baghegiau vitier in baghetg. Aschia san las vaccas mumma cun lur vadials ed il taur adina ir ora el liber. Nus vein vaccas dalla rassa Salers. Quella rassa vegn oriundamein dalla Frontscha. Lur corna imposanta dattan immediat en egl. Las vaccas sco era lur vadials vegnan mo pervesi cun pavel che nus produzin sin nies menaschi. Quei ei pastg, fein, silo ed igl atun pulenta. Els survegnan negins hormons per crescher pli spert ed era buca antibiotica ni auters medicaments. La stad passentan els sin l’Alp Nadéls. Fetg positiv vid la rassa Salers ei lur robustadad. Ils vadials restan duront circa 10 meins tier lur mumma. Suenter vegnan els mazzai ella Mazlaria Nay. Aschia han els mo in viadi da 500 meters.
Il gust e la consistenza dalla carn schai denter carn vadi e carn bov. Cunquei ch’ils vadials creschan relativamein plaun ei la carn pli aromatica e piarda cul cuschinar pli pauc aua.
Galeria da fotos
Gaglinas
Nossas gaglinas han igl entir di la pusseivladad dad ir ora el liber. Ellas san scavar entuorn, far bogn el sablun ni era piclar suenter viarms e glimaias. Lur ovs mettan ellas en ignivs specialmein construi per gaglinas. La notg sesan ellas a maschun. Ellas san beiber aua e magliar igl entir di sco quei ch’ellas vulan. Nus vein 100 gaglinas e 2 cots. La primavera vein nus savens ina ni l’autra gaglina che cua ora ovs aschia ch’ei dat adina puspei pluscheins.
Vus veis la pusseivladad da cumprar ovs frestgs a Pustget ni era en il Volg a Trun.
Galeria da fotos
